आमा, तिमी साहै्र महान

आमा 

–सुजन चालिसे

आमा, तिमी साहै्र महान,
म सम्झन्छु,
म सम्झन्छु, त्यो कालो बादल मडारिँद,ै चमक्क बिजुली चम्किएपछि गुडुङ्ङ आउने आवाज जस्तै, ए अलछिनी, अजै भाँडा माजेर सकिनस् ? भन्ने मेरो बाबुको थर्काइ

आमा, तिमी साहै्र महान,
म सम्झन्छु, अनुहार भरी गुन्द्रुक जस्तै मुजा परिसकेकी मेरी हजुरआमाले, सुनको पहेँलो दाँत टलक्क टल्काउँदै मेरी दिदीको कलीला गालामा प्याट्ट पिटेकोः सत्यानासिनी, भन्दै

आमा, तिमी साहै्र महान,
म सम्झन्छु, उ त्यो पल्लाघरे अन्टिले रामेको आमासँग, हेर न कस्तो गरीबकी छोरी रेछे, १ मुठो पैसा पनी खर्चेन रे बाउचाहिँले यस्को बिहेमा भन्दै गरेको मजाक,

आमा, तिमी साँच्चिकै महान,
म सम्झन्छु, तिमीले सम्झँदै गर्दा सम्झेको तिम्रो त्यो बालपन जहाँ, न त तिम्रो शरीर भरी, चुरोट ले डामेको डाम हुन्थ्यो, न त बिहानै उठेर जिङ्ग्रिङ्ङ कपाल फिजाँउदै बाहिर निस्कँदा, तिम्रो जीवनको मिर्मिरेमा, घाम ओइलाइसकेको हुन्थ्यो ।

जहाँ, न त समाजरुपी तीखो शाब्दिक वाणले तिमीलाइ घोच्दथ्यो, न त आगो जस्तै दन्दनी बलीरहेका वेदनाले तिम्रो मन पोल्दथ्यो ।।

अज्ञानता र आर्थिक अभावको प्रभावले, जवाफबिहिन बनेका तिम्रा बाबा आमा, या भनौँ मेरा हजुरबा हजुरआमाले, धने साहुसँग त्यो पारीको पाखो बारी बन्धकी राखेर दाइजोमा दिएको त्यो भटभटे, आज पुरानो भएछ,

आमा,
बादल खुलेपछि घामको ज्योतीले टलक्क टल्किन,े हिमालका जस्तै ती सेता दन्त्यलहर खोल्दै तिमीले हाँस्ने, मीठो हाँसो आज पुरानो भएछ ।।

मन भक्कानिएर आउँछ,
आमा, मेरो मन भक्कानिएर आउँछ, जब म सम्झन्छु नौ महिना गर्व मा अनि, जीवनको अन्तिम खुड्किलोसम्म छातीमा मलाई बोकेर हिँडेकी तिमीलाई, मेरै राक्षसरुपी आफन्तजन भनौदाहरुले कुकुरले सीनो लुछेझैँ लुछेको,
अनि, हात्तीका जत्रा पाखुराधारी कुतत्वलाई के छुन सक्ला र ? भन्दै मकैका ढोड जस्तै कलिला मेरा भुजाहरु बगलीभित्र लुकेको र स्वाभिमानी भनि टोपलिएको, मेरो शिर झुकेको ।।

तर आज,
आमा, तर आज तिम्री बुहारीले तिमीले तपक्क आँशु झार्दै फरीयाको सप्कोले सपक्क पुछेको जस्तो गरी पुछ्नु पर्दैन,

किनकी शिक्षारुपी दियालोले आज विनाशकारी कुरिती र कुचलनको अँध्यारोलाई चरक्क चिर्दै सुँइकुच्चा ठोकाइसकेको छ ।।

आमा, अब तिमी मन्द मन्द मुस्काउ,
अब तिमी मन्द मन्द मुस्काउ, किनकी तल्लो लोकको अँध्यारो चलनमा चस्मा लाएर पनि हेर्न नसकेपछि माथिको चम्किलो संसार हेर्ने रहर पुरा गर्न तिमीलाई साथ दिने त्यो डोरी, अब कसैलाइ आवश्यक पर्ने छैन,
अब तिमी मन्द मन्द मुस्काउ, किनकी तिम्री बुहारी र नातिनीहरुले अब, दाइजो नल्याएकै निहँुमा अलछिनी र सत्यानासी को उपनाम, ग्रहण गर्नुपर्ने छैन ।।

आमा, तिमी साहै्र महान ।। 

रियल म्याड्रिडमा रोनाल्डो अभाव, युभेन्टसमा रोनाल्डो प्रभाव

सुजन चालिसे, काठमाडौँ, 

असोज २१ । रियल म्याड्रिड यो सिजन ला लिगा तथा च्याम्पियन्स लिग दुबैमा खराब अवस्थाबात गुज्रीरहेको छ । गएको ३ ला लिगा तथा १ च्याम्पियन्स लिगको खेलमा उसले जित निकाल्न सकेको छैन । जित भन्दापनि रियल लगातार ४ खेलमा गोलबिहिन बनेको छ । रियल गएराति स्पेनिस ला लिगा अन्तर्गतको आठौँ खेलमा आलभेससँग अन्तिम मिनेटमा १ गोल खाँदै पराजित भएको थियो । 

सन् २००९ मा क्रिश्टियानो रोनाल्डोको आगमन पश्चात अहिलेसम्म यो अवस्थामा नपुगेको रियल उनको बाहिर्गमन पश्चात पहिलो पटक यस्तो कमजोर अवस्था देखिएको हो । हाल रियल म्याड्रिडका सम्पुर्ण सदस्य तथा समर्थकहरुले रोनाल्डोको अभाव मज्जैसित खड्किएको अनुभव गरिरहेका छन् । सिजन सुरुवातका केहि खेलहरुमा उत्कृष्ट प्रदर्शन गर्दै रोनाल्डोको कमी महसुस हुन नदिने सङ्केत दिएका करीम बेन्जेमा र ग्यारेथ बेलले आफ्नो लयलाई निरन्तरता दिन नसक्दा रियल यस्तो हालतमा पुगेको हो । 

यता रोनाल्डोको नयाँ क्लब युभेन्टसले भने सुरुवातबाटनै उत्कृष्ट प्रदर्शन गर्दै आइरहेको छ । सिजनको १० खेलमा युभेन्टसले लगातार जित निकालेको छ । यस्तो रेकर्ड युभेन्टसको इतिहासमै पहिलो पटक भएको छ । रोनाल्डोको आगमनपश्चात क्लबका धेरै खेलाडी तथा प्रशिक्षक समेत खेलमा सजिलै जित हात पार्ने सम्भावना उच्च हुने बताउँदै आएका छन् । युभेन्टससँगको आफ्नो ९ खेलमा रोनाल्डोले ४ गोल गर्दै ५ गोलको लागि पास समेत निकालेका छन् । इटालियन क्लब युभेन्टसले हाल रोनाल्डोको प्रभाव महसुस गरिरहेको छ ।